食過年糕年年高

平時大年初一一早就會同契爺契媽拜年,

之後就等大哥同二哥兩家人黎到,

媽子就會整我地最愛既煎年糕!

實在太好食啦, 外脆內軟, 煙煙韌韌, 要等成年先有得食架!

加上要經過一輪搏鬥先搶到一件年糕,

因此食到媽子煎既年糕就會覺得特別"馨香"啦!

今年無得響香港過農曆新年, 真係好唔習慣!

無利是逗不得止, 仲要新年流流無假放, 真係好可憐啊!

等左一年先有得食既年糕, 今年要年初四先食到

今仔負責操刀煎糕, 年糕、蘿蔔糕你地走唔甩啦, 嘩哈哈!

煎糕中被偷拍既今仔

賣相唔錯喎

後話: 原來唔係蘿蔔糕黎架, 比錯左芋頭糕我地, 好彩都幾好食!

我想試下用媽子既方法, 沾蛋汁煎年糕!

三塊年糕用左一隻蛋, 最後就變成蛋包糕啦

今仔塊金黃年糕好似吸引過我塊年糕奄列咁...

同場加映: 爆拆湯丸

話說呢包湯丸係響舊年7月6號出現在我家!

本來諗住嫁前煮黎一齊食既,

最後擺到今時今日我地先"的"起心肝食佢

點知半年之後就變成咁, 乜仲老得快過我呀?!!