May + MayMay + 好人一個 = Me: 大得太快啦！(October 25, 2015)

踏入17個月既Mojo, 開始聽得明媽媽鬧佢。當琴日佢同婆婆SKYPE時，比婆婆話佢食野時將隻手指放入鼻，媽媽見到就用強硬既語氣話佢，Mojo會好委屈咁含住泡眼淚，咁都好即係佢知道自己錯。今日去CHURCH，爸爸要做替工彈琴，Mojo想爸爸陪住，於是我同佢一齊去睇爸爸，我叫左佢唔好用腳踩爸爸放響地下既水樽，但佢話唔聽，要挑戰我，於是就比媽媽捉左入BB房，就算佢大喊，同媽媽覺得好尷尬都無用，媽媽係唔可以就範，如果唔係就越黎越難教。最後，媽媽帶左佢出聖堂外面行下，佢真係好開心，當我見到佢想落樓梯又或離開聖堂範圍，Mojo聽到我SAY NO都肯聽我指示，唔再踏出一步挑戰媽媽既說話。咁即係話媽媽既管教係有效。記得有個朋友話佢父母既管教方式係好似放風箏咁，要收放自如。我好認同，亦相信小朋友在大人規限既範圍入面可以自由活動，但亦要畫清界綫，比佢地知道咩係可以做，咩係唔可以做，而且真係要由細個開始教，越遲教越難教。當Mojo在聖堂外玩時，我一直同佢講嫲嫲黎到時，我地就要入去 BB房望彌撒，佢只可以響入面望住爸爸。我唔知Mojo聽唔聽得明，但當彌撒差唔多開始時，雖然嫲嫲未黎到，但Mojo都自己行樓梯入聖堂。

今日下晝我食cereal時，比Mojo食左兩粒Reese Puffs, 之後佢開始咳，我以為佢喉嚨有d cereal 碎，所以想咳出黎，比佢飲水，飲奶同食雪糕都無用，最後Mojo咳咳下嘔都一地都係之前食左既長通粉。其實嘔完舒服左仲好，但後來媽媽聽到Mojo抖氣時有d wheezing sound, 好驚佢氣管收縮，咁就可大可小。最後決定觀察下，聽日再帶佢睇醫生。