第一次實習的最後一天

終於捱到實習既最後一日!
前一晚又係要趕教材, 所以淨係瞓得一個鐘!
呢一塊版係要黎記低我同我個拍檔響呢個學期教過既野,
用左我成三個鐘整架 一陣間會攞去展覽!

擺放展覽版既班房, 每一班都被安排左個時間黎參觀, 歡迎家長入內!

睇完展覽後, 返我地自己班房開慶祝會, yeah!

咁啱呢日亦係一個女學生既生日, 佢媽媽攞左個生日蛋糕黎同佢慶祝.
個蛋糕好靚架, 中間係個Dora蛋糕, 側邊圍滿cupcakes, 唔知會唔會太甜呢?!!
我掛住做野, 無留番個cupcake比自己.
通常我都好怕食咁多糖霜既蛋糕, 都係忌廉啱我口味d!

黎到最後一日, 終於記得影返張班相, 可惜有兩個學生無返, 唔齊人>.<
呢一個係融合教室,
即係將特殊教育既學生融入普通學生既班房.
有一個學生有autism (自閉症), 另一個有ADHD (專注力不足/過度活躍症),
其他大部分係English Learners (英語非第一語言).
呢一班難教之處在於個自閉症學生有好多行為問題,
所以要佢坐響位或者聽老師話都已經係好大既挑戰!
當佢唔聽話, 響課室行黎行去, 又或者坐響位大叫,
就會分散其他學生既注意力. 有d同學甚至因為呢d行為而發笑,
咁我地就要教導佢地尊重每個人都有唔同既地方,
唔可以因為其他人怪異而恥笑人地!
睇住d學生由學期初用奇異既目光及恥笑對待有自閉症既學生,
到後來主動幫助佢完成課堂習作及提醒佢返埋自己位,
令我覺得教育工作真係好有意義, 亦提醒我選擇做老師既原因!
到十一點半, 夠鐘放學啦! 等家長接晒所有學生, 我地就開始執拾,
同埋見教授攞埋我個最後分數, 呢次實習就正式完結啦!