流落異鄉病鬼左

黎左美國成大半年, 本來身體都好好,

連由細到大既哮喘都只發作過幾次!

點知今年開始返工四日,

公司既同事就送左份大禮比我!

星期三放工時咳左幾聲, 我就知自己呢云實中招.

話說呢隻病毒已經響公司上層傳左兩星期,

源頭係黎自"疑似Bosco黃宗澤"!

佢話佢去完樓下地獄部門幫手後就病左lu,

跟住就一個傳一個, 個個排住隊請病假,

有人仲要好返之後再受感染tim

星期四放左工返到屋企即刻大覺瞓,

咩都唔理, 飯都唔食, 狂瞓, 希望會快d好返!

點知第二朝起身時覺得條氣唔順,

抖氣時仲有"he,he"聲, 心知不妙,

於是今仔就叫我唔好返工, 帶左我去睇醫生

嘩... 第一次響呢邊睇醫生呢!

有d興奮既感覺, 好似小學生去校外學習咁

大家係唔係會諗, 去到外國睇醫生, 究竟點樣同個醫生溝通呢???

咁鬼多專有名詞, 大家會唔會雞同鴨講架?!!

唔駛擔心, 呢邊有好多華人醫生架,

我地睇o個個醫生係講廣東話既, 舊年搵過佢幫我body check.

去到等左半個鐘度就有得睇啦,

跟住護士檢查時先發現自己心跳快左, 體重輕左, 仲有發燒!

醫生一見我地就問今次係邊個睇,

皆因早一個星期二, 我先陪完今仔黎睇病.

原來感冒發燒係小兒科,

醫生只係叫我去藥房買Tylenol食, 好似香港既Panadol咁.

佢話反而哮喘就棘手, 跟住就出左房去攞藥比我!

呢個醫生好好人架, 上次今仔黎睇佢都比左兩隻藥佢,

今次我仲厲害, 佢比左3隻藥我,

仲醒左張coupon比我去藥房攞支trial offer.

寫prescription時, 又話定我知有邊隻藥保險可能唔包,

係既話就唔好買啦, 用住佢比既先.

今仔都話響呢邊睇醫生第一次有藥送咋

hehe... 睇完醫生, 今仔就同左我去食早餐,

我一知要睇醫生就要佢之後帶我去食野!

豐富早餐

細個時病左, 爸爸媽咪同我睇完醫生都會帶我去附近食早餐

食完野先返屋企食藥瞓覺, 所以話小病是福呢!

口淡淡, 食西多

病左都要自己煲既鹹瘦肉瑤柱粥, 好掛住媽咪啊

響相機度發現呢塊豬排 問返今仔, 原仔係佢星期四等我開飯,

點知等到九點幾, 發現唔對路, 於是自己煎豬排食!

大家對呢塊野有咩評價呢?

P.S. 呢邊d藥好貴架! 有隻響香港賣$5粒既哮喘藥, 呢邊要3個幾美金粒, 貴成五倍 我懷疑響香港買開$60既Ventolin, 呢邊都要過百美元呢! 下次返香港要大量入貨