今仔今朝一大早就出trip, 要聽晚先返黎!
雖然只係見唔到今仔一晚咁大罷, 但我已經有唔捨得啦, 可能係已經成為習慣了.
同埋, 最重要通常我都係出左去玩o個個, 而今仔就係響屋企等我o個個架嘛, 所以要我響屋企等今仔返黎就更加唔習慣啦! 不過, 我今個weekend就會同d女性朋友去Palm Springs渡假, 所以到時今仔就要獨自悶響屋企啦
正式做老師都已經一個月啦! 每日都好攰, 差唔多日日都成七點先放工, 真係好似響香港做野咁, 朝七晚七. 通常返到屋企我已經好攰, 所以要瞓個覺, 而今仔一係就自己整野食, 一係就去今媽度食, 到今仔差唔多要瞓覺啦, 我就去起身備課! 我同今仔講我地採取輪流瞓覺制, 契媽仲笑話係唔係我地張床唔夠大
今日下晝返學校個圖書館借書, 仲諗住之後去做下運動, 點知響圖書館落樓梯時, 差錯腳仆親, 抝親隻右腳! 成個圖書館本來好靜, 所以我仆親時既巨響令到好多人望去樓梯o個邊, 好彩我係響轉角位跌親, 唔係咁多人望到
本來抝柴都唔係咩大件事, 但衰在o個個位置係從前整落既舊患, 所以一抝就會腫到成隻雞蛋咁, 而且腳掌變得又痺又無力. 我仲要為左慳返泊車錢泊左架車係條百幾級既樓梯下邊, 唯有慢慢一拐一拐咁落樓梯忍住痛開車回家
今仔平時都會車我返學校, 但因為佢想睇大學籃球賽Final Four, 所以無陪到我! 佢見到我時就話:「原來你係唔識照顧自己架, 睇少你一眼就搞成咁!」我隻腳眼腫左半吋, 一行路就痛! 今次真係可以名正言順做公主, 坐響度等今仔服侍
希望隻腳快d好返啦, 星期一仲要去面試架嘛!
琴晚食完晚飯, 無聊的我望住隻Maymay (註: 春田花花幼稚園入面一隻牛), 跟住就同今仔講:「牛頓係一隻牛!」
今仔回應:「咁朱薰係一隻豬!」
我答:「無錯! 楊怡都係一隻羊」
今仔無言以對......
**********************************************************************************
話說有一日同左一班同學去食韓式lunch, 我地研究緊點樣將我地識既唔同國家菜式融合為特式fusion菜, 跟住有一同學指出我講過話:「I cannot cook!」
之後, 我就答佢地:「I don't know how to cook, but I know how to eat, so I can cook! I don't know how to teach, but I know how to learn, so I can teach!」
我班同學封左以上呢番說話為"Mayism"
估唔到今年既第一篇網誌竟然獻了給LA惡劣既天氣
星期六下晝同同學S返大學做功課, 就響做做下功課時, 同學S就發現落雹啦!
到我想影相時, 點知就無再落, 跟住過左一個鐘, 咪即係啱啱, 一輪行雷閃電, 狂風暴雨後, 又落左一輪雹
雖然今次係第一次近距離感受落雹, 但我都係唔鍾意天陰落雨既日子, 希望快D見番太陽伯伯
February 19, 2011 | 6:28 pm
