開心哈佬喂

哈佬喂活動: Visit Pumpkin Patch (第一次去咋!)

1. 成車南瓜運走

2. 買飛玩鬼屋

一路以為會有鬼彈出黎嚇我地, 但我地實在高估左間鬼屋既恐怖程度

臨到exit前, 突然有人攞個玩具鋸彈出黎, 原來係門口收飛既小朋友 估佢唔到!

3. 鬥踩南瓜

你地估下邊個贏 當然係今仔啦! 因為佢連人地個南瓜都踩爛埋

4. 南瓜田上揀南瓜

心大心細, 最後空手而回!

Happy Halloween開心哈佬喂

詭異事件

食完晚飯, 趁住今仔玩Wii時偷拍了佢既打機照

影完相, 正想搵返個鏡頭蓋吸返好時, 突然發現個蓋唔見左

搵呀搵, 又搵書枱, 又搵客廳, 連睡房﹑廚房﹑垃圾桶都搵埋,

都仍然係無收穫! 最後連今仔都加入埋「搵蓋行動」

我諗我地前前後後都搵左成個鐘, 梳化底同枱底都摷埋!

搞左一輪, 我地都諗住放棄, 今仔仲諗緊不如聽日上Ebay買過,

就響呢個時候, 我腦海浮現起The Sixth Sense既情節:

戲入面話, 如果有d野, 你明明覺得係放響o個個位置,

但搵黎搵去都搵唔到, 咁好可能係比 "o個味野" 攞左黎玩

我咪同今仔講返套戲既情節, 之後再向空氣大叫: 「比返我呀!」

詭異既事就發生啦......

就響我大嗌完, 坐響地下, 又再搵搵下既同時, 個蓋竟然出現返響地下!

實在係太不可思議啦

跟住, 今仔就成晚響度扮比鬼上身, 不過我就覺得似比狗上身多d

湊B記

經過個半月既籌劃, 我同今仔響琴日終於擄劫左Allison Kay返屋企

可能呢排無乜見琪B, 加上表姐交佢比我時, 琪B又瞓著左,
同埋七個半月大既佢已經識認人同地方啦!

因此, 我地車到佢返屋企, 抱琪B落車時, 佢既神情好奇怪(預期中)!
我諗佢實以為自己比人拐帶

我地用左半個鐘先安撫到佢既情緒, 其實主要係我氹佢咋!
今仔一行近d, 只會令琪B喊得更厲害, 我諗琪B實當左佢係怪獸

琪B扭計中, 不斷用唔同玩具氹佢

餵食中, 簡易方便baby food

窗邊睇風景

今仔教B時間: 睇書﹑飲奶﹑瞓覺

做左五個鐘既褓姆, 實在令我疲倦不已!

 當晚十點就要上床休息, 第二朝起身時感到渾身肌肉疼痛

今次湊B發現左一樣野: 原來呢邊沖奶粉興用白開水,

即係室溫既水, 唔駛溝滾水, 真係好方便

省卻了用前臂測試溫度既步驟

二姑媽甚至話: 「有D人響雪櫃攞樽奶出黎就咁餵tim 呢邊係咁架!」