忙碌的一天 (June 2, 2012)

一早起身做功課, 因為雖然攞左臨時牌教書, 但仲要做一個維期兩年既program攞正式老師牌.

本來朝早仲要幫人補習賺下外快, 但個學生有事黎唔到.

跟住晏晝約左LAC9出黎傾計同食waffle! 唉呀, 唔記得左影返幅合照tim

好開心又識多兩個新朋友, 而家LAC9 Group己經有11人, 雖然有三個仲響香港, 等緊過黎!
記得五年前我開呢個blog時, 大部分香港嫁過黎既女仔都係響Bay Area, 直至2010年我先識到第一個LAC9 - 詩子, 估唔到兩年後就多左咁多人啦!

推介下間Waffle店先, 叫Love To Go 新開響San Gabriel. Waffle好脆好好味, 請各位支持下Local Business

Banana Chocolate Waffle with Ice Cream

吹完水後, 去左攞蛋糕, 因為夜晚要同二姑媽慶祝生日.

我地去左新港食龍蝦, 呢度係我既favorite place, 佢地既龍蝦口味真係獨一無二, 香港都食唔到, 但因為太多人黎既關係, 我地訂左七點枱都要等到八點先有位.

好濃味既榴槤沙冰

超好味既新港龍蝦

二姑媽, 生日快樂!

其實, 我食完飯仲要去Prom, 本來諗住九點幾去到, 但食完飯返到屋企都成十點啦~ 我有猶疑仲去唔去架, 因為去到會成十點半, 但個prom係去到十一點半咋!

最後, 今仔都同左我去! 真係好多謝佢肯陪我去! 我地兩個都唔鐘意, 亦都唔識跳舞, 但因為我有教seniors, 所以我都要去捧下場, 同埋我又未去過prom, 種種理由下都令我想去睇下, 感受下種氣氛. 今仔同我都係第一次去prom, 佢話貴, 所以佢讀high school時都無去過. 個restaurant係近海邊, 個夜景好靚, 好彩今仔陪我去, 唔係實悶死我, 因為我同d同事又唔係咁熟, 無乜野講, 加上我又唔跳舞, 所以會更加悶!

我地成十點九先去到, 個timing幾好, 因為d學生最後好high, 係咁叫d老師去舞池中間表現, 我都比佢地起哄左兩次, 但我係都唔出去, 差唔多所有老師都出左去solo, 連我地既女校長都有份跳. 我拍低左呢d咁珍貴既片段, 睇返都好開心!

我同senior學生既合照

學生堆在dance floor 跳舞

我同after school program既職員在旁邊扮跳舞. 原來佢做chaperon, 唔可以去dance floor同學生跳舞!

到prom臨完結時, 所有老師都去左dance floor 跳舞, 除左我.


個prom最後響十二點結束, 我地終於都可以返屋企休息啦!

祝聖 (May 26, 2012)

話說啱啱搬左屋後, 今媽就好想我地搞返個housewarming party. 我同今仔係唔鍾意搞party既人, 今仔就更加唔鍾意social, 加上佢又唔係好多朋友, 所以如果要搞, 都只係會請今爹、今媽既朋友. 加上最近終於買左張梳化, 同買左D枱櫈響後園, 叫做安頓好, 咁就開始著手搞housewarming啦!

首先就係等今媽擇日, 我地揀左long weekend既星期六, 咁搞完一日party, 起碼都有一日休息嘛! 

擇完日, 我地要去問下神父o個日可唔可以黎我地屋企同我地祝聖間屋.

神父應承左後, 我地就可以著手整invitation. 我即刻問表姐可唔可以去佢屋企整卡, 因為佢有成間書房既stamps, 卡紙同工具

整左成晚既成果:

今仔開party前一日放假. 佢同今媽去買定野準備開party, 本來我叫今仔朝早執好間屋, 但佢趕住出門口無執到, 於是今媽黎到就話好亂

我一放學就打電話比今仔, 睇下佢同今媽搞成點, 點知佢話今媽一陣上黎幫我執屋喎! 我一聽到梗係鬧爆今仔啦, 仲唔拿拿臨叫佢call今媽等佢唔駛黎咩.

不過, 今仔同我講完無幾耐, 今媽已經黎左我地屋企啦! 今仔hea左佢返屋企, 話佢同我夜晚會執架啦!

執左成晚屋, 之後第二朝又要一早起身準備食物. 好彩我只係負責菜同菠蘿

火腿係響HoneyBaked買既!

今媽就負責炒飯、炒麵同切西瓜

Serving Table

神父祝聖後響屋前影既大合照 (其實仲有其他客人, 不過佢地要遲d黎, 有兩個成八點先黎到)

今仔當日既責任就係睇住兩個小朋友, 慎防佢地整爛野, 而我就負責搵玩具比佢地玩, 同指揮今仔

用表姐送既party tray整左個糖果盒



漏夜入左D糖果去扭蛋機, 不過無人候!

Matthias: 唔知食邊粒好呢?

搵黎家中僅有既玩具比小朋友玩, 佢地出奇地玩得好開心, 仲好有創意咁添!

估唔到佢地連檸檬都玩得一餐, 連核都要爭, 仲當係寶咁包返屋企!

今仔同佢地玩到攰, 坐左響後園休息. Darius睇黎好鍾意同今仔玩, 仲係咁引佢.

最搞笑係之後有人問Darius佢爸爸係邊, 佢竟然指住今仔

是日既Housewarming Party由中午十二點直到夜晚十點, 搞足一日, 不過大家都玩得好開心, 好彩無招呼不周咋

又去捐血啦! (May 18, 2012)

又夠期捐血啦! 一收到紅十字會既電話, 我就一口應承左去. 今次去返上次個地方, 但少左好多人, 唔知夜d會唔會多d人呢?!!

瞓左上床後, 姑娘巡例問我想用邊隻手捐血, 我通常都答左手, 但佢睇完左手覺得我條血管太窄, 跟住就睇下我隻右手既血管, 之後又搵左另外一個姑娘黎睇下我適唔適合. 雖然佢都覺得我血管太窄, 但佢覺得我係regular donor, 所以都覺得應該無問題!

最後, 我用左五分鐘就捐完一袋血啦!

o個兩個姑娘同我講叫我下次捐血記住要用右手, 仲要同佢地講:「It is a good vein!」

今次捐完血後, 隻腳掂到自己包血, d血好暖, 但feel到自己既熱血, 感覺有d怪怪地! 平時捐完血都無事架, 但今次夜晚有d暈暈地!

捐完血既禮物有LA Galaxy特價飛, 不過今仔話我地要儲錢去旅行, 所以無我份啦!

Home Security 家居防盜 (May 15, 2012)

搬左新屋後, 除左即刻裝cable tv, internet, 同有綫電話外, 另一項重要事項就係set alarm啦! 本來今仔同佢屋企人都唔係好贊成裝既. 因為佢地住既地方好安全, 十幾年黎都無任何問題, 加上佢地屋企門口有條長樓梯, 所以絶對無賊會入屋打劫. 但係我地屋企唔同, 好容易就入到後園, 而且之前FACEBOOK群組有人屋企被爆格, 除左唔見野之外, 仲要比人摷亂晒間屋. 我既睇法: 被入屋打劫係睇下你好唔好彩, 因為間間屋其實都好易爆格, 但裝左alarm起碼有阻嚇作用, 可以減少賊仔逗留響屋中既時間, 減少損失. 今仔都贊同我既睇法, 所以我地最後都裝左個防盜系統.

原來裝alarm係要去當地警署攞牌照架, 之前去警局時比我發現左一d免費服務. 當我地去旅行前, 可以去警局度申請加強巡邏, 咁佢地每日到時到候就會派警察黎巡查, 不過我都覺得唔係話會百分百安全, 因為佢地只係逗留幾分鐘, 之後你屋企都係照常危險.

今日我襯空堂去左寄填左幾年既入藉表格, 順便去買埋餸, 點知就響我買野既十分鐘內, 我屋企個ALARM響左, 我因為諗住好快搞掂, 所以無攞到手機落車, 點知又係響o個一刻, security打比我睇下咩事, 佢地搵唔到我, 就call今仔, 但今仔講錯左個pass code比佢地, 所以佢地就call 左police啦!

我上到車發現今仔打過比我就即刻call返佢, 佢一話屋企個alarm響過, 之後我就拿拿臨返屋企睇下. 返屋企途中都好擔心, 開門入屋時, 我諗如果個賊仲響屋入面, 咁我應該點做? 不過, 我最後都衝左入去, check完間屋無事之後, 就call去security公司, 睇下可唔可以叫police唔好黎. 因為每年只可以有一次免費call police黎, 之後每次都要收錢, 大約USD$70一次咁啦!

之後, 屋企門口泊左架車, 今媽都黎埋, 仲帶左個朋友黎, 跟住有兩個警察同佢地同一時間到. 我一開門, 個警察就問我係邊個, 仲問我攞ID. 佢見到我個電視前面有支警棍, 即刻攞起黎睇同問我點得返黎?!! 後來佢睇到寫住HONG KONG POLICE, 我話係SOUVENIR. 佢見到我個ID, 但個地址係今媽屋企, 唔係我屋企地址, 就問我有無電費單, 或者水費單可以證明我住響度. 好似當左我係賊咁! 我一時間搵唔到, 而且我知就算有都係寫今仔名. 個警察幫我睇埋信箱有無我既信, 但都係無. 最後, 佢睇到我個櫃上面D結婚相, 話OK啦, 知道我係響度住. D警察響屋外同屋內行左一陣就走左啦, 之後今媽個朋友順便參觀埋我地間屋, 跟住都走埋. 我執埋D野就返番學校執埋D手尾!

其實, 今次已經係SECURITY公司第三次CALL我地. 第一次我泊好車後, 未熄ALARM自己開左車房既一度門, 之後個alarm響左, 即刻有人call我. 第二次係我地出左門口十幾分鐘, 收到個電話話有度門開左, 但我同今仔都認為係我地出車房時度門未閂實, 於是我地無call police, 跟住自己返屋企check下. 其實, 我覺得響屋企裝返個alarm真係會安全d. 我地個security company係local既, 三十幾蚊一個月買個安心都係值得既! 我表姐用開d連鎖公司既service, 好似要七十幾蚊一個月.

去年既5月3日 (May 3, 2011)

呢排真係好無記性, 返到屋企成日唔記得閂車房門, 有一日甚至唔記得帶電腦返學校, 又有一日返到屋企突然唔記得alarm個密碼係乜, 唔知係唔係用晒d腦力響工作上, 所以返到屋企就咩都唔記得呢!

諗左好耐都唔記得舊年既呢一日我做過d咩, 搵左好耐, 終於比我搵返d相, 原來舊年同今仔去左BOILING CRAB食海鮮慶祝! 都係趁我記得, 拿拿臨寫返多d blog, 等我第日老左可以回憶番!
生活太快, 時間太少, 唯有盡力寫啦!

黎左5年啦! (May 3, 2012)

話咁快我就黎左LA 5 年啦, 不過我好懶, 仲未肯入藉!

話說舊年我都有嘗試去填o個張煩人既入藉表格, 但佢地問既野實在太多啦, 例如: 過左黎呢幾年打過咩工, 同埋每次離美國境都要紀錄低. 我最憎就係填form架啦, 所以填到第二頁我就停左無再填, 之後將個波丟左比今仔. 今仔話等我響呢邊住夠五年就幫我填埋份表格, 因為要填返過去五年既野, 佢唔想幫我填埋響香港既住址喎!

今仔而家都開始緊幫我填form啦, 希望好快可以搞掂寄出啦!

5月3日係我黎美既大日子, 但返工實在太忙啦, 我差d都唔記得左呢日! 去到食dinner時我先記得, 跟住就同今仔講啦, 佢話佢返工時醒起, 咁我即刻扮嬲, 因為佢記得都無表示嘛! 扮嬲唔睬佢, 到我真係太攰瞓著左, 但第二朝我都繼續扮嬲佢架! 臨出門口前, 我同佢講話要佢諗定節目同我慶祝!

好彩, 今仔都不負所望, 雖然只係去睇下戲, 但總好過咩都無做啦! 第二晚, 我地就去左戲院睇左兩套港產片: 桃姐同春嬌與志明. 估唔到而家LA已經變到越黎越香港, 真係要咩有咩咁滯.....

睇桃姐我都有少少眼濕濕, 但竟然睇春嬌流既淚水多過桃姐喎! 今仔笑我話乜套戲唔係笑片黎既咩?!! 睇完戲後, 我問今仔咁多年黎我影響左佢d咩, 佢話我令佢變得更識關心人, 例如得閒買下野送比屋企人! 咁今仔又影響我D咩呢? 我諗係令我自閉左, 黐家左, 同學識左SAY NO!!!


睇下... LA有埋芒果河粉甜品啦, 真厲害!

The Lorax & The Vow (Mar 2, 2012)

星期五返學時比D學生激親, 心情低落. 咁啱今仔唔駛返工, 於是我就提議去睇戲食飯, 唔係我會發癲

咁啱呢日係Dr. Seuss' Birthday, 我地去睇佢既作品The Lorax 3D.

買飛時有小朋友戴住Dr. Seuss Cat in the Hat 既帽. 我記得我朋友個仔仔話比我知, 佢地班呢日有個pajama party慶祝Dr. Seuss' Birthday!

The Lorax 3D
我覺得好好睇, 大人細路都啱睇! 個message係呼籲大家要保護環境, 唔係將來我地既小朋友連樹都未見過, 而且要比錢買新鮮空氣.

個故事都好有教育意義, 等我地知道如果為左錢而去不斷砍伐樹木, 到最後所有資源用盡時, 受苦既都係我地!

D樹畫得好靚, 好似童話入邊既仙境, 識唱歌既魚同得意既熊BEAR BEAR都係笑位!

Quote from The Lorax:
Unless someone like you cares a whole awful lot, nothing is going to get better. It's not.

The Vow
好耐無響戲院睇愛情片, 因為要就返今仔睇D男仔鍾意既打鬥片、恐怖片.

我覺得幾好睇, 而且係真人真事改編. 個結局好意想不到.

以前睇過一套漫畫個故事係話個男仔醒返唔記得左同佢女朋友發生過既所有事, 細個睇時覺得好慘, 睇到喊.

當然大個睇呢套戲時都會睇到眼濕濕, 一諗到如果有一日今仔唔記得左我地一齊發生過既事會點呢?

呢D野都係唔好諗咁多, 最重要就係「珍惜所有, 活在當下」!