第二次捐血 (Feb 24, 2012)

自從舊年暑假第一次去捐血後, 紅十字會周不時都會打我手機, 叫我去捐血! HEA左佢地好多次後, 上個禮拜終於答應佢地去捐血, 仲即場預約埋日期同時間.

本來諗住叫個同學仔同我一齊去捐血, 但因為佢約左O個日做身體檢查, 所以我要自己一個去!

去到目的地兜左一個圈, 都唔覺附近有紅十字會既banner又或標誌, 泊完車再行個圈, 終於比我響某個parking lot度見到紅十字會架車.

一入到去見到既情形

我都唔知邊殊係reception, 之後有個工作人員指左我去sign in. 跟住, 佢地比個folder我, 叫我睇晒入面既資料, 睇完資料無問題後就比左個號碼我等.

職員叫左我埋藍色簾後面問問題同拮手指, 之後再答電腦上既一連串問題.

跟住, 就係瞓上床度捐血啦.....

佢地問我想捐邊隻手, 我話左手, 於是個職員睇完我左手既血管, 覺得太幼捐唔到, 再睇我右手, 又話唔得.

之後, 佢搵左兩個職員黎睇, 個個都擰晒頭, 又問我之前有無捐過血, 有無飲夠水.

最後, 有個職員決定幫我試下抽右手. 我諗佢地差唔多收工, 我去到時六點, 但到我抽血時已經係七點, 佢地驚我捐得慢啩?!!

好彩最後都好成功, 我用左唔駛六分鐘已經抽好一包血. 依稀記得, 第一次捐時的而且確係捐得幾耐下!

捐完血坐埋去小食枱度休息

仲有好多禮物

右手被包到成隻糭咁! 其實個傷口只係得一個針窿咁大.

最開心既係捐完血有藉口咩都唔駛做, 等今仔服侍!

疑似分子美食 - The Bazaar (Jan 26, 2012)

今次係第二次黎食啦! 話說今仔見到Dine LA又有The Bazaar, 而佢又咁啱訂到位!

於是, 我地就搵個理由出去食大餐啦! 

今仔靜靜雞訂左位, 跟住前一個禮拜同我講話同我去食大餐, 我係咁問點解, 佢話新年要去慶祝喎!

Dine LA Menu

呢度係食TAPAS, 所以每碟都好精緻, 份量好細!

EMBUTIDOS PLATTER - CHORIZO, LOMO, SALCHICHON
個飽又脆又薄, 配火腿一流!

海膽係我既至愛! 呢個Dine LA Menu無既. 配搭好特別, 又中又西又日.
Sea urchin, Avocado, steamed buns 

另一至愛: "PHILLY CHEESESTEAK" - AIR BREAD, CHEDDAR, ROYAL TRUMPET MUSHROOM
個飽超薄, 薄到好似紙咁, 入面仲裝滿芝士, 但又唔會漏喎, 超讚! 必點既item. 

食完都唔知係咩黎, 但今仔堅持話係魚黎既!
MARKET CEVICHE - JICAMA, MICRO CILANTRO, COCONUT

SEA SCALLOPS - ROMESCO SAUCE
帶子好大粒, 個汁好特別!

JICAMA WRAPPED GUACAMOLE - MICRO CILANTRO, CORN CHIPS
最鍾意混入左粟米片, 好脆! 唔知可唔可以自己整呢?!!

SEARED STRAUSS VEAL LOIN - JAQUES MAXIMIN, PISTO, TRUMPET MUSHROOMS
牛肉, 唔係太特別~

JAPANESE EEL TACOS - GRILLED EEL, SHISO, CUCUMBER, WASABI, CHICHARRON
其實我唔係太鍾意食鰻魚, 不過試下無妨!

甜品時間
HOT CHOCOLATE MOUSSE - PEAR SORBET AND SALTY HAZELNUT PRALINE
TRADITIONAL SPANISH FLAN - VANILLA AND FRUIT
呢度食完野後, SERVER會通知甜品部, 之後我地要等人帶我地去餐廳既另一邊食甜品.
由於我地去食野O個晚太多人, SERVER話要等半個鐘先有位食甜品, 所以我地選擇坐響原位食!

OPEN KITCHEN
今次坐左響廚房外面, 可以睇住班廚師煮野食!

餐廳環境
燈光昏暗, 但唔係行浪漫情調架, 反而適合同兩三個朋友黎飲酒食野.

今次坐左響大枱, 要同其他人SHARE

PATISSERIE
好靚啊！希望有機會試下呢度既AFTERNOON TEA

等攞車時在門口拍照

2012年第一天上班

放左三個禮拜假, 終於要返工啦~ 實在好唔捨得我既假期, 而且又唔想返工.

呢三個禮拜過得好充實:

1. 搬左屋, 家陣仲執緊野
2. 有兩個大學同學由香港到訪, 同佢地去左三藩市同Vegas, 仲見證埋佢地既婚禮. 第一次簽名做證婚人
3. 同朋友食飯聯誼, 和今仔在家中hea

不過, 我無做過任何工作上既野, 又或讀書上既野, 所以呢一年又要加倍努力啦~

2012年新年大計:

1. 做野快d, 儘量六點前離開學校
2. 改掉放工瞓覺既習慣, 要早睡早起
3. 星期六、日要準備好黎緊一星期既課程
4. 逢星期三跟朋友去學zumba
5. 做多d運動, 食少d野, 要減肥
6. 捐多幾次血
7. 保持家居整潔, 皆因我最憎執野
8. 買少d 野, 少出街食飯, 慳多d錢
9. 暑假去歐洲旅行
10. ***************** (保持神秘)

唯一一幅四人合照

2012年1月1日

2011年......

總括黎講: 忙同攰, 不過好充實, 又識左好多新朋友!

1. 去年回港逗留一個月, 令我難得可以響香港倒數, 仲參加埋死黨既婚禮. (我覺得自己慢慢已適應左呢邊既生活, 無以前咁掛住香港啦)

2. 出席了三個好朋友的婚禮及做了3次姊妹, 分別在香港, LA同Las Vegas, 仲第一次做左LA識既朋友既姊妹! (當然我係得力既姊妹)

3. 有好多香港親朋好友黎LA探我: 2月有大哥一家和中學同學, 6月有我父母, 12月有大學同學和2月黎過既中學同學. (希望來年有更多好友探訪, 最好就等我放大假先黎)

4. 完成了一個碩士課程, 暫時告別校園生活!

5. 找到了一份理想工作, 最開心既係擁有了我們既DREAM HOUSE



HOUSE HUNTING STORY

話說我地係9月先開始睇屋, o個陣曾經睇中一間好鍾意既, 價錢低, 而且係一見傾心, 可惜今媽同今爹唔係太鍾意. 佢地話間屋對面有電塔會影響健康. 我同今仔當然唔相信呢樣野, 但今媽有樣野講得啱既, 就係轉手會較難, 而且我都唔想第日買左間屋後會比佢地話同煩住, 所以最後都無買到. 之後, 今仔都有上網搵屋, 再叫agent帶我地睇. 一直都睇唔啱, 今仔都話睇屋係要睇幾個月, 預計2012年先會買到. 某日, 今仔又帶我同今媽睇屋, 睇左幾間後, 今媽對其中一間有意思. 其實我就唔係太鍾意, 但都可以接受既. 第二日同今仔考慮緊要唔要入紙買時, 今媽原來當日早上帶左今爹去睇過間屋, 今爹仲指出一個非常大既缺點. 今媽同我地講出個致命傷, 仲好踴躍咁話要同我地去睇返o個間屋, 再講多次比我地知間屋有咩問題. 今仔都唔想去, 皆因佢都唔係十分滿意間屋, 所以唔入紙都無咩問題, 但由於今媽既熱情, 我地就被迫返去啦! 咁啱o個度附近有open house, 我地就迫今仔車我同今媽去睇, 點知一睇完, 我同今媽都好鍾意. 可惜, 間屋實在太貴啦, 個listing price比我地想要既高出15%. 今仔話太貴啦, 唔駛諗~ 今媽即日再同今爹去睇過, 連今爹都好滿意喎! 今仔話太貴, 負擔唔起, 所以我同今媽都無辦法! 之後一個禮拜, 我地又去睇返間DREAM HOUSE, 個agent話暫時只得2個offer, 同我地講話睇啱不妨試下. 今仔一路都嫌貴, 無意思買, 但我就話入offer都唔會蝕, 反正我地都係第三個offer咋嘛, 又唔係有20個offers, 入黎試下囉! 其實之前已經入過一間, 但個owner調高黎賣, 所以我地都無再糾纏落去. 對於呢間無心買既DREAM HOUSE, 我地係打定輸數, 所以都未等人地counter offer, 今仔又去繼續搵屋, 我地又不斷睇屋. 又有一日, 今仔睇中左間我地負擔到既而且又不錯既屋. 雖然未至於一見鍾情, 但間屋都算唔錯, 闊落之餘, 個廳同廚房我都好滿意, 但有好多野要自己慢慢執, 好似個地板、空調同後園. 我地又再一次入offer, 完全無諗住等DREAM HOUSE既回覆. 到呢間屋既owner覆我地, 我地考慮緊應以咩價回番之際, 隔左幾個星期無聲氣間DREAM HOUSE既agent竟然問我地個agent, 個owner要我地個offer加六千, 問我地有無興趣. 我地正響殊研究緊第三間入offer既屋個inspection report同計緊執間屋到我地滿意要幾多錢, 對裝修我地都唔在行, 我地又係怕煩既人, 最好就係買翻新過既屋, 起碼自己有個預算要比幾多錢落間屋度. 經過再三考慮, 今仔同我就扑鎚買我地既DREAM HOUSE. 之後兩個月就係搞貸款手贖, 同等銀行批貸款, 我倆十五十六, 擔心這, 憂心那, 直至12/13/2011, 我們終於正式擁有我們的DREAM HOUSE了! 12/18/2011我們已經搬進新屋了. 現在就係忙執拾和整理, 因為我實在有太多野啦! 我都唔明點解4年幾前, 我倆家中只有兩個睡袋, 何解今時今日會發展到一廳既雜物?!!

仍然未係教徒既我, 在此特別感謝天主既眷顧, 令我地能夠擁有自己既DREAM HOUSE!

2012年......

努力工作、賺錢、儲錢去旅行，再計劃組織大家庭吧!

今仔去公幹

今仔今朝一大早就出trip, 要聽晚先返黎!

雖然只係見唔到今仔一晚咁大罷, 但我已經有唔捨得啦, 可能係已經成為習慣了.

同埋, 最重要通常我都係出左去玩o個個, 而今仔就係響屋企等我o個個架嘛, 所以要我響屋企等今仔返黎就更加唔習慣啦! 不過, 我今個weekend就會同d女性朋友去Palm Springs渡假, 所以到時今仔就要獨自悶響屋企啦

正式做老師都已經一個月啦! 每日都好攰, 差唔多日日都成七點先放工, 真係好似響香港做野咁, 朝七晚七. 通常返到屋企我已經好攰, 所以要瞓個覺, 而今仔一係就自己整野食, 一係就去今媽度食, 到今仔差唔多要瞓覺啦, 我就去起身備課! 我同今仔講我地採取輪流瞓覺制, 契媽仲笑話係唔係我地張床唔夠大

抝柴 (April 2, 2011)

今日下晝返學校個圖書館借書, 仲諗住之後去做下運動, 點知響圖書館落樓梯時, 差錯腳仆親, 抝親隻右腳! 成個圖書館本來好靜, 所以我仆親時既巨響令到好多人望去樓梯o個邊, 好彩我係響轉角位跌親, 唔係咁多人望到

本來抝柴都唔係咩大件事, 但衰在o個個位置係從前整落既舊患, 所以一抝就會腫到成隻雞蛋咁, 而且腳掌變得又痺又無力. 我仲要為左慳返泊車錢泊左架車係條百幾級既樓梯下邊, 唯有慢慢一拐一拐咁落樓梯忍住痛開車回家

今仔平時都會車我返學校, 但因為佢想睇大學籃球賽Final Four, 所以無陪到我! 佢見到我時就話:「原來你係唔識照顧自己架, 睇少你一眼就搞成咁!」我隻腳眼腫左半吋, 一行路就痛! 今次真係可以名正言順做公主, 坐響度等今仔服侍 希望隻腳快d好返啦, 星期一仲要去面試架嘛!

無聊對話 (Feb 21, 2011)

琴晚食完晚飯, 無聊的我望住隻Maymay (註: 春田花花幼稚園入面一隻牛), 跟住就同今仔講:「牛頓係一隻牛!」

今仔回應:「咁朱薰係一隻豬!」

我答:「無錯! 楊怡都係一隻羊」

今仔無言以對......

**********************************************************************************

話說有一日同左一班同學去食韓式lunch, 我地研究緊點樣將我地識既唔同國家菜式融合為特式fusion菜, 跟住有一同學指出我講過話:「I cannot cook!」

之後, 我就答佢地:「I don't know how to  cook, but I know how to eat, so I can cook! I don't know how to teach, but I know how to learn, so I can teach!」

我班同學封左以上呢番說話為"Mayism"