攞景

唉, 我又唔見野啦

話說9月29號 (Wed) 我攞住好多野返大學, 跟住同個同學坐shuttle去左off campus既Book Mart買野! 由於間書店唔比攞袋入去, 於是我就攞左部Netbook出黎, 最後返到campus個同學要等一個朋友. 我地坐左響某棟building出邊既bench. 太多野攞既關係, 我放晒d野響個bench上面, 亦因為我太攰, 臨離開時都無發現自己無攞齊野! 就係咁, 我部舊年聖誕先買既netbook, 連埋最近先買既cover就從此消失了

一路都認為兩個人做咩要用三部電腦, 好似有D浪費! 到最近諗住帶部netbook返學, 開始用電腦抄notes, 點知我部netbook就離我而去了, 只怪我從前唔識珍惜佢!

唔開心同內疚左幾日後, 貪新忘舊既我已經睇中左部touchscreen netbook 不過, 為左令自己得到教訓, 我都會儘量克制自己, 唔可以咁容易就買過部!

因為呢件事, 我就同今仔講:「死啦! 第日我會唔會唔見左我地既仔女架 我會唔會漏左佢地響車, 掛住攞餸, 唔記得佢地架 將來我既仔女成日唔見野, 你千祈唔好鬧佢地, 唯有怪佢地阿媽遺傳左d "大頭蝦" 基因比佢地!」

同今仔講完呢番話既兩日後, 香港既有線新聞報導就話有對夫婦響時代廣場漏低左一個女嬰, 再過一日又有學童被遺留在校車, 最攞景既係唔見netbook既一星期後「星期二檔案」播「有失有得」! o個集講香港每年有幾多人遺留物件在地鐵, 仲訪問左一個家庭, 個小朋友唔見左個飯壺, 但最後都搵得返, 另外仲有幾個失而復得既例子!

係唔係真係咁啱得咁橋呀?!!

Links:
時代廣場遺女嬰父母被扣查
被遺校巴 4歲童拍窗友獲救 入睡被困半小時 警拘司機保母
星期二檔案 有得有失

今仔不在家的第五天 (October 8, 2010)

天晴大風

今仔不在家, 呢個禮拜我返學日日都遲到, 每日都瞌眼瞓 今日要響大學上堂, 由早上八點直落到下晝五點, 連食lunch既一小時都被用作開會, 全日呆坐在課室

放學返左屋企休息一陣, 跟住又去左今家食晚飯! 唔知由幾時開始, 我同今媽、今爹都可以單獨相處, 已經做到一家人咁 大概係由今媽去年患病開始, 當時我每日都會車出車入, 陪佢去睇醫生. 之後, 去到年尾, 今媽跌傷隻腳, 我就每日下晝返今家煮野比佢食, 慢慢傾下, 發覺今媽都唔係一個難相處既人! 最意外係佢同今爹下個星期返香港, 今媽話佢會約我爸爸、媽咪飲茶, 我真係覺得今媽好識禮數

夜晚返到屋企, 同今仔講電話, 知道佢病左, 好擔心! 我個心即係諗: 「去悠閒度假都會病既」唔知佢係唔係患左相思病呢

十月九日
仲有15分鐘我就要出門同今爹、今媽上加拿大啦 我已經準備好一大袋藥比今仔!

今仔不在家的第四天 (October, 7, 2010)

天晴多雲

太陽終於出黎啦

今日繼續唔夠瞓, 上堂時亦好攰! 明明已經暖返D, 但我坐響課室改簿仍然改到手凍腳凍, 忍唔住去架車度攞張氊入課室! 我個mentor知道後大笑一番, 仲叫我企響個雪櫃隔離吸下發出既熱氣

有個學生問我今日會唔會教書, 佢話"I like your teaching!", 聽到呢句話話真係開心晒! 放學後hold左個tutoring, 有十二個學生黎左, 最高興係令到一個上堂遊雲, 返屋企又唔溫書, 基礎又打得唔好既學生明白堂上學既野, 同完成一份功課 我同我個mentor都好擔心呢位學生! 根據我mentor既形容: "呢位學生唔督促住佢, 佢就會去左發夢, 但你猛咁叫佢做野, 佢又會好焦躁, 仲會好似心臟痛發咁抖唔到氣!" 經過我今日既貼身輔導, 我發現佢連堂上一D好基本既指令都唔明白, 例如: 點樣響張graph paper上劃x-axis同y-axis. 其實, 我mentor響堂上已經講左好多次, 但係佢原來一路都唔知點做. 我今日教佢做substitution, 佢先恍然大悟咁樣! 希望以後會多d機會同佢接觸, 等我可以了解下佢!

放學後, 去左做facial同剪頭髮, 我諗我實在太攰啦! 做facial時瞓到不醒人事 夜晚返左今家食飯, 比我偷聽到今媽講電話, 發現左件不可思議既詭秘事件! 頭先同今仔討論, 佢都不敢相信 星期二既謎團終於解開, 被人吊癮既滋味真係唔好受! 祝福謎團既兩位主角, 希望事情會按照原定計劃進行

今仔不在家的第二天 (October 5, 2010)

下雨

我懷疑今仔真係貴人, 佢琴日朝早出門就開始落雨, 今日又繼續落雨, 好凍呀 上個星期一 (9/27) LA Downtown 錄到自1877年有紀錄以黎最熱既一日(113F), 一個禮拜後竟然跌左50F, 得返65F. 天氣真係反常呀!
L.A.'s Hottest Day Ever
Low Temperature Records
上星期一夜晚八點都仲係110F, 熱到好似去左Las Vegas咁, 我真係感覺到熱氣從地面上昇. 今個星期一同樣時間, 我就凍到打冷震, 要攬住張氊去上堂!

今朝好攰, 好眼瞓, 駕緊車返工時都好想瞓! 唔知係唔係因為天氣影響呢 早一日無瞓覺好似仲精神過瞓五個鐘喎! 唔通我個睡眠週期係要瞓雙數鐘數?!!

本來諗住一落堂就即刻衝返屋企瞓覺, 點知要開會 開左個半鐘後, 終於走得, 跟住就開始落雨啦! 去完旅行社查詢機票後, 心情有點低落, 本來既計劃未能實行! 一個人在家真係有d悶, 睇怕我都係鍾意熱鬧既人

今仔不在家的第一天 (October 4, 2010)

下雨

今仔加拿大既表哥星期日(10/10/10)結婚, 今仔身為表弟專誠請假一星期飛去加拿大幫手籌備. 可惜, 我星期五要全日上堂, weekend先可以上去. 於是, 今日就變左係我響美國第一次自己一個響屋企.

今媽好擔心我自己一個在家, 仲邀請我去佢屋企過夜, 但因為我覺得唔係咁方便, 做功課又有好多野要拎, 所以都堅持響自己屋企. 二姑媽以為我自己一個人會驚, 仲叫我去表姐屋企住幾日添

我自己反而覺得呢個禮拜我可以做多d野, 同瞓多d覺, 因為唔駛煮飯嘛! 當然, 我亦心思思想約朋友出黎食晚飯, 實行今仔不在家, 我亦唔黐家

琴晚成晚開夜車, 朝早又要返中學, 夜晚仲要上堂, 成八點先放學. 之後, 就去左今家食飯. 今媽實在太好啦 佢仲預備埋lunch同湯比我帶返屋企.

返到自己屋企時已經係九點半, 寒冷既天氣令我只想喱響被竇同今仔講電話. 真係好懷念從前朝朝晚晚同今仔煲粥既日子